სახალხო დამცველის აპარატი თბილისში, შეზღუდული შესაძლებლობის მქონე პირებისთვის განსაზღვრული პარკირების წესს დისკრიმინაციულად მიიჩნევს. კანონში, 2016 წლის ცვლილების მიხედვით, მანქანის შშმ პირთათვის განკუთვნილ პარკირების ადგილზე გაჩერების უფლება მხოლოდ მკვეთრად გამოხატული შეზღუდული შესაძლებლობის მქონე პირებს შეუძლიათ.
2016 წლის 6 აგვისტოს საქართველოს სახალხო დამცველმა თბილისის მუნიციპალიტეტის საკრებულოს რეკომენდაციით მიმართა და თბილისში, სატრანსპორტო საშუალებების პარკირების რეგულირების წესის ხელახალი განსაზღვრა მოითხოვა.
"თბილისის საკრებულო ამართლებს ამგვარ მიდგომას, ვინაიდან კანონმდებლობა ზოგადად განასხვავებს მკვეთრად და მნიშვნელოვნად გამოხატულ შეზღუდვას, ახალი რეგულაცია კი შეღავათს იმ პირთა წრის მიმართ აწესებს, რომლებიც ფაქტობრივი მოცემულობიდან გამომდინარე, უფრო მაღალი ხარისხის მზრუნველობას საჭიროებენ.
სახალხო დამცველმა აღნიშნული საკითხი შეზღუდული შესაძლებლობის სამედიცინო მოდელის კონტექსტში განმარტა და მიიჩნია, რომ სპეციალური პარკირების ადგილით სარგებლობის მიზნისთვის, შესაბამისი პირები ერთმანეთთან უნდა გათანაბრდნენ არა მათთვის მინიჭებული შეზღუდული შესაძლებლობის სტატუსის, არამედ ამ უფლებით სარგებლობის ინდივიდუალური საჭიროების გათვალისწინებით", - წერია ომბუდსმენის განცხადებაში.
