გომბორის უღელტეხილზე ავტოსაგზაო შემთხვევის ფაქტზე მძღოლს რვაწლიანი პატიმრობა მიესაჯა. ავტოსაგზაო შემთხვევა გომბორის უღელტეხილზე 9 ივნისს მოხდა. მძღოლს ექსკურსიაზე სკოლის მოსწავლეები მიჰყავდა. შემთხვევის შედეგად ოთხი ადამიანი დაიღუპა. 

„სასამართლო პროცესზე გამოკვლეული მტკიცებულებებით დადასტურდა, რომ  2018 წლის 9 ივნისს, დაახლოებით 11:20 საათზე, ვაზიანი-გომბორი-თელავის საავტომობილო გზაზე ბ.კ.-მ, რომელიც „დოჯი სპრინტერის“ მარკის ავტომობილს მართავდა და ექსკურსიაზე მიმავალი სკოლის მოსწავლეები და მათი ახლობლები გადაჰყავდა,  სოფელ თეთრწყლების მიმდებარე ტერიტორიაზე მოძრაობის დროს  დაარღვია „საგზაო მოძრაობის შესახებ“ საქართველოს კანონის 21-ე მუხლის მესამე პუნქტის და 33-ე მუხლის პირველი პუნქტის მოთხოვნები, მოსახვევში გადაჭარბებული სიჩქარის გამო შესვლისას ვერ უზრუნველყო ავტომობილის უსაფრთხოდ მართვა, რის შედეგადაც ავტომანქანა გადავიდა გზიდან, შეეჯახა გზის დამცავ ჯებირს და ჯერ მცირე ზომის კლდეზე, შემდეგ კი საავტომობილო გზაზე გადავარდა.  

ავტოსაგზაო შემთხვევის შედეგად დაიღუპა ოთხი მგზავრი, ხოლო თერთმეტმა  ჯანმრთელობის დაზიანებები მიიღო."  - ნათქვამია პროკურატურის მიერ გავრცელებულ განცხადებაში.