პარტია „თავისუფალი საქართველოს“ ლიდერის კახა კუკავას თქმით, ბიზნესმენ ლევან ვასაძის პასუხს საპრეზიდენტო კანდიდატობის შეთავაზებაზე კვირის ბოლომდე დაელოდება. თუმცა, როგორც „ლიბერალს“ კუკავამ უთხრა, ვასაძეს, „როგორც ჩანს დიდი ხალისი არ აქვს“.

„საჯაროდ შევთავაზეთ, რაიმე კონსულტაციები და მოლაპარაკებები არ გვქონია. ეს არის ჩვენი საჯარო პოზიცია. მივესალმები თუ ლევანი ამას გადაწყვეტდა, თუმცა, დიდი ხალისი, როგორც ჩანს არ აქვს“, - უთხრა კუკავამ „ლიბერალს“.

კახა კუკავას თქმით, მისი პარტიის კანდიდატის წარდგენა კვირის ბოლოს იქნება. ვასაძესთან ერთად პარტიაში სხვა კანდიდატებსაც განიხილავენ, მათ შორის თავად კუკავს კანდიდატურას. თუმცა ლევან ვასაძეს, პარტიის ლიდერის თქმით, მასსა და სხვებზე გაცილებით დიდი რეიტინგი აქვს.

„ლევანი სხვა კანდიდატებისგან გამოირჩევა იმით, რომ მისი ავტორიტეტი არ მოითხოვს გაზომვას და კონსულტაციებს. მისი რეიტინგი ბევრად აღემატება ჩემსასაც და სხვისასაც. ამიტომ ლევანი თუ გადაწყვეტდა, არ იქნებოდა სადავო“, - უთხრა კუკავამ „ლიბერალს“.