ოკუპირებულ აფხაზეთში, ქალაქ გუდაუთაში რუსი და აფხაზი სამხედროების ერთობლივი წვრთნა გაიმართა, მეშვიდე სამხედრო ბაზის, შავი ზღვის ფლოტისა და მეოთხე საჰაერო არმიის დანაყოფების მონაწილეობით.
წვრთნაში 2000-ზე მეტი ჯარისკაცი და 600 ერთეული სამხედრო ტექნიკა იყო ჩართული. მათ შორის სადესანტო გემი БДК, Ка-52 ტიპის ვერტმფრენები და ახალი ტანკები Т-72Б3. ინფორმაციას რუსული მედია ავრცელებს.
სწავლების სცენარის მიხედვით, სანაპიროს დაცვის მიზნით, აფხაზეთში რუსეთის სამხედრო ბაზის დესანტი გუდაუთის პოლიგონის სანაპირო ზოლზე გადმოსხეს. დესანტს მხარდაჭერა ჰქონდა როგორც ზღვიდან სამი სარაკეტო კატარღით, ისე ჰაერიდან Ка-52 ტიპის ვერტმფრენებით. სანაპირო ზოლის დაცვის შემდეგ, სცენარის მიხედვით, აფხაზი და რუსი სამხედროები სწრაფ კონტრშეტევაზე უნდა გადასულიყვნენ.