აშშ თავდაცვის ავტორიზაციის აქტით, რომელსაც დონალდ ტრამპმა 13 აგვისტოს მოაწერა ხელი, თურქეთისთვის ერთ-ერთი ყველაზე ძლიერი ავიაგამანადგურებლების მიწოდებას დროებით შეაჩერებს.
აშშ-სა და თურქეთის მთავრობებს შორის შეთანხმებას, რომლითაც ანკარას 100 F-35 ტიპის თვითმფრინავი უნდა მიეღო, სენატორთა ნაწილი ჯერ კიდევ ხელშეკრულების გაფორმებამდე ეწინააღმდეგებოდა.
აშშ-ის ხელისუფლებამ თურქეთთან ხელშეკრულება მაინც გააფორმა და 2 გამანადგურებელი გადასცა. ამასთან, ანკარამ რუსეთისგან S-400 ტიპის თავდაცვის სისტემების შესყიდვაც გადაწყვიტა, რის გამოც თვითმფრინავების გადაცემის მოწინააღმდეგეთა რაოდენობა ვაშინგტონში გაიზარდა.
18 ივნისს სენატმა მიიღო თავდაცვის ავტორიზაციის კანონპროექტი, რომლის ერთ-ერთი პუნქტით აშშ-ის ხელისუფლებას თურქეთისთვის ავიაგამანადგურებლების გადაცემის დროებით შეჩერებას სთხოვდა.
თურქეთთან დიპლომატიური დავის გამწვავების პარალელურად დონალდ ტრამპმა თავდაცვის ავტორიზაციის აქტს ხელი მოაწერა და ვაშინგტონი, როგორც Foreign Policy წერს, თურქეთისთვის F-35 ტიპის ავიაგამანადგურებლების გადაცემას დროებით შეაჩერებს.
