ანკარაში აშშ-ის საელჩოს ესროლეს - ამის შესახებ ინფორმაციას CNN Turk ავრცელებს. 

მათი ინფორმაციით, საელჩოს რამდენიმე ტყვია მანქანიდან ესროლეს. ტყვია დაცვის სამსახურის შენობას მოხვდა, თუმცა არავინ დაშავებულა. 

შემთხვევა დაახლოებით 5:00 საათზე მოხდა. პოლიცია დამნაშავეებს ეძებს, რომლებიც თეთრი მანქანით გადაადგილდებოდნენ. 

____________________________

თურქეთსა და აშშ-ს შორის ურთიერთობა თურქეთში ამერიკელი პასტორის, ენდრიუ ბრანსონის დაპატიმრებამ გაამწვავა. 

ანკარა მას  ჯაშუშობასა და 2016 წლის სამხედრო გადატრიალების მცდელობის ორგანიზატორად მიჩნეულ ოპოზიციონერ  ფეტულა გიულენთან კავშირში ადანაშაულებს.

მომხდარის გამო აშშ-მა თურქეთს სანქციები დაუწესა. ბრანსონის დაკავების პასუხად დონალდ ტრამპმა გააორმაგა ტარიფები ფოლადსა და ალუმინზე, რამაც თურქეთში ლირის სწრაფი გაუფასურება გამოიწვია.