ხაშურში, სოფელ ცედანთან ფოთლოვანი ტყის საფარი იწვის. ხანძარი გუშინ საღამოს გაჩნდა და მის ჩაქრობას 200-ზე მეტი მეხანძრე-მაშველი ცდილობს. დღეს ხანძრის ქრობის პროცესში შინაგან საქმეთა სამინისტროს ვერტმფრენიც ჩაერთო. გადაწყვეტილება საგანგებო სიტუაციათა მართვის სამსახურმა შსს-სთან კონსულტაციის შემდეგ მიიღო.
საგანგებო სიტუაციების სამსახურის უფროსის მოვალეობის შემსრულებელის შალვა ხუციშვილის თქმით, ხანძრის რამდენიმე კერა ლიკვიდირებულია, დარჩენილია ორი აქტიური კერა, ერთ ადგილას მისულია ტექნიკა, მაგრამ მეორე ხანძრის კერა მიუვალ ადგილასაა და ცეცხლის ჩასაქრობად შსს-ს ვერტმფრენი ჩაერთო.
საგანგებო სიტუაციების მართვის სამსახურის ინფორმაციით, ხანძრის შედეგად დამწვარია 10 ჰექტრამდე მიწის ფართობი, ცეცხლის ჩასაქრობად ვერტმფრენთან ერთად დამატებით სპეცტექნიკის მობილიზებაც გახდა საჭირო.
