თბილისის საქალაქო სასამართლომ „საქართველოს ეროვნული ერთობის“ წევრ გიორგი ჭელიძეს აღკვეთის ღონისძიების სახით პატიმრობა შეუფარდა.
საქმის პროკურორმა სასამართლო სხდომაზე განაცხადა, რომ ბინაში შესვლისას ბრალდებული შევარდა საპირფარეშოში, მოანგრია უნიტაზი, მოგლიჯა საკანალიზაციო მილი და იქ ცდილობდა ვაზნების ჩარეცხვას.
„როდესაც პოლიცია გიორგი ჭელიძის სახლში ჩხრეკის ჩასატარებლად მივიდა, ბრალდებული შევიდა სააბაზანოში, მოანგრია უნიტაზი, მოგლიჯა საკანალიზაციო მილი და იქ ცდილობდა ვაზნების ჩარეცხვას, თუმცა ვერ მოახერხა. ამასთან, გიორგი ჭელიძეს საკმაოდ ახლო ურთიერთობა აქვს საქმეზე სასამართლოში მოწმედ დასაკითხ პირებთან და არსებობს მოწმეებზე ზემოქმედების საფრთხე, რათა მათ ბრალდებულისთვის სასარგებლო ჩვენება მისცენ", - განაცხადა პროკურორმა.
დაცვის მხარე ბრალდებულისთვის 1000 ლარიან გირაოს ითხოვდა.
თბილისის პოლიციის დეპარტამენტის თანამშრომლებმა ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვა-ტარების ბრალდებით, „საქართველოს ეროვნული ერთობის'' წევრი გიორგი ჭელიძე 1 სექტემბერს დააკავა.
დანაშაული 2-დან 5 წლამდე თავისუფლების აღკვეთას ითვალისწინებს.