თენგიზ კალანდიას, რომელიც ხორავას ქუჩის საქმეზე დანაშაულის შეუტყობინებლობისთვის იყო დაკავებული და წინასწარ პატიმრობაში იმყოფებოდა, აღკვეთის ღონისძიება შეეცვალა და საპატიმრო დაწესებულებიდან აგვისტოს ბოლოს გაათავისუფლეს.
„ევროპული საქართველოს" და ხორავას ქუჩის საქმეზე შექმნილი საპარლამენტო საგამოძიებო კომისიის წევრმა, ოთო კახიძემ, როგორც „ლიბერალს" უთხრა, ეს იმიტომ მოხდა, რომ სასამართლო პროცესი საგანგებოდ გაწელეს, და კალანდიას 9-თვიანი ვადა ეწურებოდა.
კანონით, წინასწარი პატიმრობის უმაღლეს ვადად სწორედ 9 თვეა განსაზღვრული.
თენგიზ კალანდია 4 დეკემბერს, დანაშაულის შეუტყობინებლობის ბრალდებით დააკავეს. ის ხორავას ქუჩაზე მომხდარი მკვლელობის საქმის ფიგურანტის, მ.კ.-ს მამაა.
კალანდიას ადვოკატის, დარეჯან ბუცხრიკიძის თქმით კი მოსამართლემ ვერ დაინახა თენგიზ კალანდიას წინასწარ პატიმრობაში დატოვების საჭიროება და ამიტომ გაათავისუფლა, მისი თქმით, არ არსებობს საფრთხე იმისა, რომ კალანდია მიიმალება, მოწმეებზე ზეგავლენას მოახდენს და ა.შ. ადვოკატმა „ლიბერალთან საუბარში აღნიშნა, რომ ასეთ შემთხვევაში არ არის საჭირო სახელმწიფომ დამატებითი ხარჯი გაიღოს კალანდიას პატიმრობისთვის, ვინაიდან მისი შენახვისა და ტრანსპორტირებისთვის ხარჯს სახელმწიფო წევდა, ახლა კი მას თავად მოუწევს სასამართლოში გამოცხადების ხარჯის გაღება და ესეც მნიშვნელოვანი არგუმენტია მის გასათავისუფლებლად.