დღეს სოფელ ხელთბუნის მცხოვრებლებს გორის ავტობანი დაახლოებით ერთი საათის განმავლობაში გადაკეტილი ჰქონდათ. აქციის მონაწილებმა საპროტესტო მსვლელობით გორის მერიის შენობასთან გადაინაცვლეს.
აქციის მონაწილეები ხელთუბანში მოკლული 18 წლის ახალგაზრდის, თორნიკე მერებაშვილის სიკვდილის რეალური მიზეზის დადგენას და დამნაშავეების დასჯას მოითხოვენ.
თორნიკე მერებაშვილის ოჯახი სამართალდამცავებს დამნაშავეების მფარველობაში ადანაშაულებს.
მოკლულის ოჯახის ამტკიცებს, რომ ორი სოფლის გზაგასაყარზე მოზარდებს შორის კამათი სისხლიან დაპირისპირებაში გადაიზარდა, რა დროსაც თორნიკე მერებაშვილს სასიკვდილო დაზიანებები მიაყენეს.
დაღუპულის მამა, მერაბ მერებაშვილი ამბობს, რომ მისი შვილი მოკლულია. მამის ინფორმაციით, სიკვდილამდე თორნიკემ ბიძაშვილს დაურეკა და უთხრა, რომ დაჭრილი იყო და დახმარება სჭირდებოდა.
„ესენი მუშაობენ სულ სხვა რამეზე და მე ვიცი, რომ ჩემი შვილი მოკლეს და მალავენ მკვლელს. მოვითხოვ შს სამინისტროსგან, მოვიდნენ აქ მაღალჩინოსნები, გენერალური პროკურორი, შემხვდნენ, რომ ავუხსნა ყველაფერი. მე დასაკარგი არაფერი ამქვს.
ვაფრთხილებდი ორი თვე. ყველაფერი გააკეთეთ, რომ მერე რამე ზღაპარი არ მოიგონოთ. არ გავჩერდები. ამხელა სოფელი გამოვიდა. დამნაშავის დასჯას მოვითხოვ დაუყოვნებლივ. ამათ იციან, რა მოხდა. შს სამინისტრო მალავს. თავი აქვს გახეთქილი, ეგ გადატარებით არ ხდება.“ - განაცხადა აქციაზე მოკლული თორნიკე მერაბაშვილის მამამ.
„სამი თვეა სამართალს ვეძებთ. მშვიდობიანი აქცია დაარბიეს. პატარა ბავშვებს ხელით შეეხნენ. ეჭვი გვაქვს რომ ვიღაცას აფარებენ ხელს. მკვლელს ხელს აფარებენ.
მთელი სოფელი გვერდზე მიდგას, გარდა იმ არამზადებისა ვინც იმ მკვლელებს უდგას გვერდზე. ვინც სიმართლეს იცის და არ ამბობენ სიმართლეს.“ - განაცხადა აქციაზე გარდაცვლილის დედამ.