გუშინ, 18 სექტემბერს, სოციალურ ქსელში გავრცელდა მშობლის პოსტი, სადაც ის ქუთაისის N2 საჯარო სკოლის პედაგოგის მხრიდან მისი შვილის მიმართ გამოვლენილ ბულინგზე საუბრობდა.
„მასწავლებელი რომელიც ვერბალურ ბულინგს გააზრებულად ახორციელებს პირველივე დღეს ახალ მოსწავლესთან არის დამნაშავე !! მასწავლებელი რომელიც თმის ვარცხნილობის გამო გენდერს ეჭვქვეშ აყენებს და ჯგუფს მიმართავს გასარკვევად ბიჭია თუ გოგო, არის დამნაშავე !! არ ვიცნობ ამ მასწავლებელს პირადად , მაგრამ უკვე ვიცი რომ მან შეძლო ჩემს შვილში ზიზღის გრძნობის გაღვიძება!!“,- წერს მშობელი.
განათლების სამინისტროში აცხადებენ, რომ ქუთაისის N2 საჯარო სკოლაში ბულინგის შესაძლო ფაქტს შიდა აუდიტი სწავლობს.
„იმ შემთხვევაში, თუ მშობლის მიერ გავრცელებული ინფორმაცია დადასტურდება, რომ მისი შვილის მიმართ სკოლის რომელიმე წარმომადგენლის მხრიდან ადგილი ჰქონდა ფიზიკურ, ფსიქოლოგიურ ან ნებისმიერი სახის ძალადობას, სამინისტროს მხრიდან რეაგირება უმკაცრესი იქნება“,- ნათქვამია სამინიტროს მიერ გავრცელებულ განცხადებაში.
