შინაგან საქმეთა სამინისტროს ამ დრომდე არ მოუხდენია რეაგირება 25 წლის გოგოს განცხადებაზე, რომელიც უკვე 10 წელია, ფსიქოლოგიური ძალადობის ქვეშ ცხოვრობს.
მის შესახებ სტატია „ლიბერალმა" ორი კვირის წინ მოამზადა. ახალგაზრდა ქალი ამბობს, რომ მისთვის უცნობი მამაკაცი წლებია, ემუქრება და მისგან შანტაჟისა და ადევნების მსხვერპლია. ამგვარი ზეწოლის გამო, ახალგაზრდა ქალმა მიატოვა სამსახური, სასწავლებელი და რამდენიმე თვეა, საზღვარგარეთ წავიდა, რადგან ყოველდღიურ შიშში ცხოვრება უკვე აღარ შეეძლო. უცხო ქვეყანაში წასვლა გამოსავალი არ აღმოჩნდა, რადგან მოძალადისგან ოჯახის წევრებზე მუქარა, მის მიმართ შანტაჟი და შეურაცხყოფა არ შეწყვეტილა.
ოჯახმა პოლიციაში განცხადება 20 ივნისს შეიტანა, თუმცა ამ დრომდე პოლიციას აღნიშნული პირი არც გამოუკითხავს.
გამოძიება სისხლის სამართლის კოდექსის 151-ე მუხლით მიმდინარეობს, რაც მუქარას ითვალისწინებს.
25 წლის გოგოს ინტერესებს ახალგაზრდა იურისტთა ასოციაცია იცავს.
