შს მინისტრის მოადგილის, ნათია მეზვრიშვილის თქმით, ის პერიოდი, სანამ კანაფის კულტივაციის კანონპროექტის განხილვა შეჩერებული იქნება, ხელისუფლებამ საზოგადოების ინფორმირებისთვის უნდა გამოიყენოს, თუმცა, როგორც მან განაცხადა, შსს შეეგუება კანაფის კულტივაცია-ექსპორტის შესახებ კანონპროექტის გაწვევის შესახებ გადაწყვეტილებასაც.
„დრო, რაც პარლამენტმა აიღო ამ საკითხთან დაკავშირებით და შეაჩერა კანონპროექტის განხილვა, მაქსიმალურად უნდა გამოვიყენოთ იმისათვის, რომ საზოგადოებას ავუხსნათ, ამ კანონპროექტში ცუდი არაფერია, რისკის შემცველი არ არის და პირიქით, რეგლამენტსა და ჩარჩოებში ექცევა საკითხები, რომლებთან დაკავშირებითაც გვაქვს ქაოსური მდგომარეობა“, - განმარტავს შს მინისტრის მოადგილე.
ნათია მეზვრიშვილი მიიჩნევს, რომ კანაფის შესახებ კანონპროექტები მას სამართლებრივ ჩარჩოებში აქცევს და ამით არათუ ნარკოტიკის მოხმარება წახალისდება, პირიქით, ნარკოდანაშაულისა და ზოგადად, ნარკოტიკების წინააღმდეგ ბრძოლა უფრო ეფექტიანი გახდება.
„თუ საკანონმდებლო ორგანო ინიციატივის განხილვას მიუბრუნდება, უწყება მზად არის, პროცესში თავისი კომპეტენციის ფარგლებში ჩაერთოს“, - დასძენს მეზვრიშვილი.
პარლამენტმა კანაფის კულტივაცია-ექსპორტის კანონპროექტის განხილვა, სასულიერო პირების პროტესტის ფონზე, შეაჩერა და გაურკვეველი დროით გადადო. უმრავლესობა მიიჩნევს, რომ ამ კანონპროექტით მარიხუანის მოხმარება არ წახალისდება. ამის მიუხედავად, პარლამენტის თავმჯდომარის თქმით, თუ არსებობს საფრთხე, რომ ამ კანონპროექტმა შეიძლება ნარკოტიკული საშუალებების არალეგალური მიმოქცევა წაახალისოს, მას გაიწვევენ.
კობახიძე: თუ ნარკოტიკული საშუალებების არალეგალური მიმოქცევა წახალისდება, პროექტს გამოვიწვევთ
