გაერთიანებულ ოპოზიცია „ძალა ერთობაშიაში“ შემავალმა პოლიტიკურმა პარტიებმა უწყებათაშორისი კომისია დატოვეს.
აღნიშნულის შესახებ დღეს ბრიფინგზე „ნაციონალური მოძრაობის" წევრმა, ლევან ბეჟაშვილმა ისაუბრა. მისი თქმით, ბოლო პერიოდში პარტიებსა და არასამთავრობო ორგანიზაციებს არაერთი შენიშვნა და რეკომენდაცია დაუგროვდათ. ბეჟაშვილმა აღნიშნა, რომ კომისია და მისი ხელმძღვანელი თეა წულუკიანი არ აპირებენ რადიკალური ცვლილებების შეტანას საქმიანობაში. ამ გადაწყვეტილების შემდეგ გაერთიანებული ოპოზიცია არასამთავრობო ორგანიზაციებთან კომუნიკაციას სხვა ფორმატში გააგრძელებს.
„ბოლო პერიოდში უწყებათაშორისი კომისიის მუშაობასა და ამ კომისიის ხელმძღვანელის მიმართ ბევრი პრეტენზია დაგროვდა. როგორც პოლიტიკურ პარტიებს, ასევე არასამთავრობო ორგანიზაციებს არაერთი შენიშვნა და რეკომენდაცია ჰქონდათ, თუმცა ბოლო პერიოდში განვითარებული მოვლენები ცხადყოფს, რომ კომისია და მისი ხელმძღვანელი თეა წულუკიანი არ აპირებენ რადიკალური ცვლილებების შეტანას თავიანთ საქმიანობაში. მეტიც, დაიწყო შეზღუდვები იმ მონაწილეების მიმართ, რომლებიც კომისიის მუშაობაში მონაწილეობენ, არ იღებდნენ გადაწყვეტილებებს იმ საკითხებზე, რომლებიც კონკრეტულ სუბიექტებს აწუხებდათ. ამიტომ, ჩვენ ვტოვებთ უწყებათაშორის კომისიას და სხვა ფორმატში გავაგრძელებთ არასამთავრობო ორგანიზაციებთან კომუნიკაციას“,-განაცხადა ლევან ბეჟაშვილმა.
დღეს უწყებათაშორისი კომისია პარტია „ევროპულმა საქართველომაც“ დატოვა. პარტიის წევრის, ოთო კახიძის თქმით, კომისია საარჩევნო დარღვევებზე არ რეაგირებს, მისი მუშაობა ფარსს დაემსგავსა, რის გამოც „ევროპული საქართველო" ამ ფორმატში მუშაობის აზრს ვეღარ ხედავს.
წინა კვირაში უწყებათაშორისი კომისია არასამთავრობო ორგანიზაციამ „ახალგაზრდა იურისტთა ასოციაციამაც“ დატოვა.