თბილისის მერიას „ღამის ეკონომიკის“ კვლევის მომსახურების შესყიდვას გეგმავს და ამისთვის მზადაა, რომ 172 616 ლარი გადაიხადოს.
როგორც სახელმწიფო შესყიდვების ვებგვერდზე ვკითხულობთ, მერიის განმარტებით, თბილისის „ღამის ეკონომიკის” ამჟამინდელ მდგომარეობასთან დაკავშირებით, მიზანშეწონილია, მოკლე ვადებში განისაზღვროს კვლევაზე დაფუძნებული გრძელვადიანი სტრატეგია და სამოქმედო გეგმა. ზემოთ ხსენებულმა აქტივობებმა ხელი უნდა შეუწყოს როგორც მოქალაქეების ცხოვრების ხარისხის გაუმჯობესებას და ქალაქის ურბანულ განვითარებას ღამის პერიოდში, ასევე მოსახლეობის ჩართულობისა და აქტიურობის ზრდას.
„ღამის ეკონომიკა დეფინიცია - ღამის ეკონომიკა გულისხმობს ნებისმიერ ეკონომიკურ აქტივობას, რომელიც 20:00 საათიდან იწყება და დილის 8:00 საათამდე გრძელდება. განსაკუთრებით მნიშვნელოვანია ისეთი სექტორების როლი, როგორებიცაა გართობა, დასვენება და კულტურული ღონისძიებები, ტრანსპორტი, ხმაურის რეგულირება, უბნების რეგენერაცია და უსაფრთხოება, რომელიც ღამის ეკონომიკის ძირითად კომპონენტებს წარმოადგენს. ღამის ეკონომიკას მნიშვნელოვანი წვლილი შეაქვს ტურიზმის ზრდაში და დღის მანძილზე მიმდინარე სხვადასხვა ეკონომიკურ აქტივობასთან მნიშვნელოვნადაა დაკავშირებული", - ვკითხულობთ ვებგვერდზე გამოქვეყნებულ ინფორმაციაში.