პატრიარქის ქორეპისკოპოსი, მეუფე იაკობი ფიქრობს, რომ ხელისუფლება კანაფის წარმოების შესახებ კანონპროექტს გამოიწვევს. ამის შესახებ მეუფე იაკობმა „შაბათის კურიერში“ ისაუბრა.
„გადაგდება ვერ მოხდება, საკუთარ თავს ხომ ვერ გადაიგდებენ. ეს იქნებოდა სულელური ნაბიჯი,“ - განაცხადა მეუფემ.
მეუფე აცხადებს, რომ, თუ აღნიშნული კანონპროექტის განხილვა არ შეჩერდებოდა, არჩევნებამდე ძალიან მძიმე პროცესი დაიწყებოდა.
„არჩევნებზე მეტად უფრო მძიმე ეს პროცესი იქნებოდა, არჩევნები შეიძლება, აღარც გახსენებოდა კაცს,“ - აცხადებს მეუფე.
მეუფე აცხადებს, რომ აღნიშნულ კანონპროექტთან დაკავშირებით გადაწყვეტილების მიმღებ პირთან შეხვედრა გამართა, თუმცა, ვისთან, არ აკონკრეტებს.
პარლამენტმა კანაფის კულტივაცია-ექსპორტის კანონპროექტის განხილვა, სასულიერო პირების პროტესტის ფონზე, შეაჩერა და გაურკვეველი დროით გადადო. უმრავლესობა მიიჩნევს, რომ ამ კანონპროექტით მარიხუანის მოხმარება არ წახალისდება. ამის მიუხედავად, პარლამენტის თავმჯდომარის თქმით, თუ არსებობს საფრთხე, რომ ამ კანონპროექტმა შეიძლება ნარკოტიკული საშუალებების არალეგალური მიმოქცევა წაახალისოს, მას გაიწვევენ.
კობახიძე: თუ ნარკოტიკული საშუალებების არალეგალური მიმოქცევა წახალისდება, პროექტს გამოვიწვევთ
„კანაფის კულტივაციაზე კანონპროექტის განხილვამდე აუცილებელია საზოგადოების ინფორმირება" - მეზვრიშვილი
