თურქეთში, სარფის საზღვრიდან 1 კილომეტრში თურქული სანომრე ნიშნიანი მიკროავტობუსი ავტობუსს შეეჯახა და დაშავდა მიკროავტობუსში მყოფი საქართველოს 11 მოქალაქე. ამის შესახებ აჭარის ჯანდაცვის მინისტრმა ზაალ მიქელაძემ „ინტერპრესნიუსთან“ განაცხადა.
მისი თქმით, საქართველოს მოქალაქეები გადაიყვანეს საავადმყოფოებში. მოქალაქეები ნაწილმა საავადმყოფო უკვე დატოვა, ხოლო 7 მოქალაქე ისევ რჩება საავადმყოფოში.
„დაახლოებით 10:00 საათზე, სარფი-ქემალფაშას გზაზე, სარფის საზღვრიდან 1 კმ.-ში, თურქულ სანომრე ნიშნიანი მიკროავტობუსი შეეჯახა ავტობუსს, რის შედეგადაც დაშავდა მიკროავტობუსში მყოფი საქართველოს 11 მოქალაქე.
საქართველოს მოქალაქეები გადაიყვანეს ხოფასა და არხავის სახელმწიფო საავადმყოფოებში, სადაც მათ ჩაუტარდათ პირველადი სამედიცინო დახმარება. ამ დროისთვის საქართველოს მოქალაქეთა ნაწილი, პირადი სურვილით, გაწერილია საავადმყოფოებიდან, ხოლო 7 მოქალაქე სამედიცინო დაკვირვების მიზნით რჩება საავადმყოფოში“,- განაცხადა ზაალ მიქელაძემ.
მისი თქმით, საქართველოს მოქალაქეთა ჯანმრთელობის მდგომარეობა დამაკმაყოფილებელია, მათ სიცოცხლეს საფრთხე არ ემუქრება და სამედიცინო დაწესებულებებიდან დღის ბოლომდე გაიწერებიან.