შინაგან საქმეთა მინისტრმა, გიორგი გახარიამ „ქართული ოცნების“ ოფისში მმართველი პარტიის შეხვედრის შემდეგ ჟურნალისტებთან ისაუბრა. გიორგი გახარიამ დაადასტურა, რომ ბიძინა ივანიშვილსა და ზაზა ოქუაშვილს შორის შეხვედრა შედგა და თავადაც ესწრებოდა.
გუშინ ტელეკომპანია „რუსთავი 2-თან“ ინტერვიუში ტელეკომპანია „იბერიის“ დამფუძნებელმა და ბიზნესმენმა ზაზა ოქუაშვილმა განაცხადა, რომ ბიძინა ივანიშვილმა მას 4 მილიონი დოლარის გადახდა მოსთხოვა.
„თუ სერიოზულად ვსაუბრობთ, რა თქმა უნდა, ეს ერთი მსახიობის თეატრი ღიმილის მომგვრელია. ყველა კითხვას გაეცემა პასუხი თბილისშიც, ლონდონშიც და ბატონი ოქუაშვილი თუ მოინდომებს - ბომბეიშიც. არანაირი პრობლემა არ არის. თუმცა ბატონ ოქუაშვილს მოუწევს თითო თეთრის გადახდა იმ ვალიდან, რაც აქვს. შეხვედრა შედგა, მე მაშინ ვიყავი ბიზნესომბუდსმენი, როგორც ჩანს, ძალზედ ძლევამოსილი ბიზნესომბუდსმენი და ვერ ვგრძნობდი. შეხვედრის მიზანი იყო ადგილობრივი ბიზნესის საკითხი და იმ გაუბედურებული კომპანიის მხარდაჭერა, რომელმაც დააგროვა ამხელა ვალი სახელმწიფოს წინაშე. მე გავცემ პასუხს ყველა კითხვაზე ყველგან, თბილისშიც, ლონდონშიც და ბომბეიშიც და ოქუაშვილი გადაიხდის ბოლო ლარს ბიუჯეტში, რაც მას ეკუთვნის", - განაცხადა გიორგი გახარიამ.
