ვენაში ფიროსმანის ნამუშევრების გამოფენა მოეწყობა. ალბერტინას მუზეუმში გამოფენა 26 ოქტომბერს გაიხსნება და 27 იანვრამდე გაგრძელდება.
NIKO PIROSMANI – A Wonderer Between Worlds - ამ სახელწოდებით გამართულ გამოფენაზე წარმოდგენილი იქნება მხატვრის 29 ნამუშევარი საქართველოს ეროვნული მუზეუმის, შალვა ამირანაშვილის სახელობის ხელოვნების მუზეუმის კოლექციიდან.
გამოფენის ორგანიზატორია საქართველოს ეროვნული მუზეუმი, განათლებისა და კულტურის სამინისტროსთან ერთად. ეს არის ფიროსმანის პირველი ფართომასშტაბიანი გამოფენა ვენაში. გამოფენის შესახებ 5 ოქტომბერს თბილისში დიმიტრი შევარდნაძის სახელობის ეროვნულ გალერეაში პრესკონფერენცია გაიმართება.
პროექტის ფარგლებში, ალბერტინას მუზეუმში ასევე პირველად გამოიფინება ცნობილი იაპონელი არქიტექტორის, ტადაო ანდოს მიერ სპეციალურად შექმნილი მაგიდა, რომელიც ნიკო ფიროსმანაშვილის ხსოვნას ეძღვნება.
