დედაქალაქის მერიამ იუსტიციის სახლს ტაქსით მომსახურების გაწევაზე ნებართვის გაცემის ორგანიზებისთვის 150 000 ლარი გადაუხადა.
სატენდერო ხელშეკრულების თანახმად, იუსტიციის სახლის ვალდებულება იყო ნებართვის გაცემასთან დაკავშირებით განცხადების მიღება, კონსულტაცია, ნებართვის მაძიებლის იდენტიფიცირება, ელექტრონული განაცხადის შევსება, განაცხადზე განმცხადებლის ელექტრონული ხელმოწერის მოთავსება, განმცხადებლისთვის ინვოისისა და ამობეჭდილი ნებართვის გაცემა.
21 აგვისტოდან იუსტიციის სახლი ტაქსით მომსახურების გაწევის მსურველთათვის ნებართვებს გასცემს. პირველი ოქტომბრიდან არალიცენზირებულ ტაქსებს მგზავრთა გადაყვანა აეკრძალათ, თუმცა ლიცენზიის გაცემა გრძელდება.
28 სექტემბერს, ანუ სექტემბრის ბოლო სამუშაო დღეს თბილისის იუსტიციის სახლში მოქალაქეთა ძალიან დიდი რაოდენობა მივიდა. ტაქსის მძღოლების გარდა, თავიანთი საქმიანობის დასარეგისტრირებლად ის პირები მივიდნენ, რომლებიც „შრომის უსაფრთხოების შესახებ“ საქართველოს მთავრობის დადგენილებით განსაზღვრულ მომეტებული საფრთხის შემცველ მძიმე, მავნე და საშიშპირობებიან სამუშაოებს ახორციელებენ.
