პარლამენტის თავმჯდომარე ირაკლი კობახიძეზე ხუმრობის შემდეგ ტელეკომპანია „იმედის“ შოუ „ვასმედია“, რომლის წამყვანიც ვასიკო ოდიშვილი იყო, შეჩერდა.
ჟურნალისტური ეთიკის ქარტიის აღმასრულებელი დირექტორი ნატა ძველიშვილი ამბობს, რომ ცენზურის ლეგიტიმური ეჭვი ჩნდება საზოგადოებაში, რადგან მიუხედავად ანონსისა, დაგეგმილი გადაცემა არ გავიდა და ფაქტია, რომ ახლად დაწყებული გადაცემა შეჩერდა.
„გაჩნდა ბევრი ეჭვი და ამიტომაც ახლა მენეჯენტს მოუწევს საზოგადოების დარწმუნება, რომ ეს გადაწყვეტილება არ უკავშირდებოდა ვასიკო ოდიშვილის იუმორისტულ გამოსვლას და ირაკლი კობახიძის კრიტიკას.
თუ ფორმატის შეცვლა მიმართულია იქითკენ, რომ ფორმები შეიცვალოს და რაღაც გაუმჯობესდეს. ცხადია, პრობლემა არ იქნება, მაგრამ, როგორც კი შინაარსში იქნება ცვლილება და საზოგადოებას შეექმნება განცდა, რომ ტონის შესარბილებლადაა დასახელებული ფორმატის შეცვლა, ეს ეჭვები კიდევ უფრო გაიზრდება.
ცხადია, რომ ამ მოცემულობით, რა რეალობაც გვაქვს - ანონსების მიუხედავად, არ გავიდა გადაცემა და ახლად დაწყებული გადაცემის ფორმატზე მიდის მსჯელობა. ჩვენ ყველამ ვიცით, რომ ასე ხშირად ფორმატები არ იცვლება და მით უმეტეს - გადაცემის შინაარსი. ცხადია, რომ ძალიან ლეგიტიმური ეჭვი არსებობს საზოგადოებაში, რომ შესაძლოა, აქ ყოფილიყო ცენზურა," - ამბობს ნატა ძველიშვილი.
ირაკლი კობახიძეზე ხუმრობის შემდეგ ვასიკო ოდიშვილის შოუ ტვ „იმედზე" შეჩერდა
