„სიკვდილის ფესტივალის წინააღმდეგ", - „ქართული იდეა" მხარდამჭერებს მოუწოდებს, 20 ოქტომბერს, 15 საათზე, დედაენის ბაღში შეიკრიბნონ. დედაენის ბაღში, ხვალ, 20 ოქტომბერს „გირჩი" „კანაფის ლეგალიზაციის ფესტივალს" მართავს.
„ხელისუფლების სატელიტი „გირჩის" სექტა, 20 ოქტომბერს, დედაენის ძეგლთან, მთავრობის ხელშეწყობით მართავს მარიხუანის ფესტივალს და აანონსებს იმას, რომ შემდგომში ეს დღე ყოველწლიურად უნდა აღინიშნოს საქართველოს მარიხუანის გამსაღებელ სახელმწიფოდ გადაქცევის და ნარკოტიკების ლეგალიზაციის დღედ!..", - ნათქვამია „ქართული იდეის" მიერ შექმნილ facebook ივენთში.
როგორც „გირჩი" წერს, მიაჩნიათ, რომ კანაფის მოხმარების ლეგალურობა, სულ მცირე, ნიშნავს უფლებას, გაზარდო კანაფი და მოიხმარო ის, ლეგალურად და ცივილიზებულად, ისე, როგორც ამას აკეთებენ ადამიანები ნორმალურ ქვეყნებში.
„სწორედ ეს უნდა გავაკეთოთ ამ ფესტივალზე - ერთმანეთს დავეხმაროთ კონსტიტუციური უფლების რეალიზებაში, როგორ და რა ფორმით, ამაზე შეგვიძლია ვიმსჯელოთ და შევთანხმდეთ", - წერს „გირჩი".
---
შსს-ს კანაფის ფესტივალთან დაკავშირებით გასულ კვირას განცხადება გაავრცელა და აღნიშნა, რომ თუ ე.წ. ფესტივალზე ადგილი ექნება ნარკოტიკული საშუალების გასაღებას, ფლობას, მოხმარებას თუ პოპულარიზაციას, პოლიცია ყველა სამართალდამრღვევი პირის მიმართ გაატარებს საქართველოს კანონმდებლობით გათვალისწინებულ მკაცრ ზომებს.