ტელეკომპანია „იბერიის“ თანამშრომლები ხელმძღვანელობას წერილით მიმართავენ. დასაქმებულები რეორგანიზაციის გამო, ხელფასის ანაზღაურებასთან დაკავშირებით შეკითხვებზე პასუხს მოითხოვენ.
მათი თქმით, ჟურნალისტებსა და ოპერატორებს აინტერესებთ, შეძლებენ თუ არა მუშაობის გაგრძელებას და ანაზღაურების მიღებას.
„ჩვენ დღეს ვითვლებით ტელევიზიის თანამშრომლებად, მაგრამ ჩვენ არ გვაქვს მუშაობის საშუალება. გვაინტერესებს, ჩვენ შევძლებთ თუ არა მუშაობის გაგრძელებას, როგორ გაგრძელდება ჩვენი ურთიერთობა მომავალში და თუ არ გაგრძელდება, როდის მოხდება უკვე ნამუშევარი ხელფასების ანაზღაურება და კომპენსაციების გაცემა,“ - განაცხადა „იბერიის“ პირველადი პროფკავშირული ორგანიზაციის თავმჯდომარემ, გიორგი ჯიბღაშვილმა.
ტელეკომპანია „იბერია“ 17 ოქტომბრიდან აღარ მაუწყებლობს. ეკრანზე ჩანს მხოლოდ წარწერა: „ხელისუფლებამ დახურა იბერია!!!“
ტელეკომპანიის მესაკუთრე „ომეგა ჯგუფის“ დამფუძნებლები ხელისუფლებას ბიზნესზე ზეწოლასა და ამ გზით კრიტიკულად განწყობილი ტელეარხის დახურვაში ადანაშაულებენ.