„პოლიციამ იაგო ხვიჩია და ვახტანგ მეგრელიშვილი მიმდინარე გამოძიების ფარგლებში საგამოძიებო მოქმედებების ჩასატარებლად პოლიციის განყოფილებაში გადაიყვანა", - ამის შესახებ „ლიბერალს" შსს-ში განუცხადეს.
შსს-ს თქმით, ე.წ. კანაფის ფესტივალთან დაკავშირებით დაწყებულია გამოძიება სისხლის სამართლის კოდექსის 273-ე პრიმა მუხლის მე-2 და მე-8 ნაწილებით უკვე დაწყებული აქვს, რაც მცენარე კანაფის ან მარიხუანას უკანონო შეძენა-შენახვას და გასაღებას გულისხმობს და პოლიციამ ხვიჩია და მეგრელიშვილი სწორედ ამ გამოძიების ფარგლებში საგამოძიებო მოქმედებების ჩასატარებლად პოლიციის განყოფილებაში გადაიყვანა.
დედაენის ბაღში დღეს „გირჩი" კანაფის ლეგალიზების ფესტივალის გამართვას აპირებს.
როგორც „გირჩი" წერს, მიაჩნიათ, რომ კანაფის მოხმარების ლეგალურობა, სულ მცირე, ნიშნავს უფლებას, გაზარდო კანაფი და მოიხმარო ის, ლეგალურად და ცივილიზებულად, ისე, როგორც ამას აკეთებენ ადამიანები ნორმალურ ქვეყნებში.
„სწორედ ეს უნდა გავაკეთოთ ამ ფესტივალზე - ერთმანეთს დავეხმაროთ კონსტიტუციური უფლების რეალიზებაში, როგორ და რა ფორმით, ამაზე შეგვიძლია ვიმსჯელოთ და შევთანხმდეთ", - წერს „გირჩი".
შსს-ში განმარტავენ, რომ თუ ე.წ. ფესტივალზე ადგილი ექნება ნარკოტიკული საშუალების გასაღებას, ფლობას, მოხმარებას თუ პოპულარიზაციას, პოლიცია ყველა სამართალდამრღვევი პირის მიმართ გაატარებს საქართველოს კანონმდებლობით გათვალისწინებულ მკაცრ ზომებს.
