პრემიერ-მინისტრის მამუკა ბახტაძის თქმით, სამგორიდან ლილოს მიმართულებით მეტროს ხაზს გაიყვანენ. ბახტაძემ აღნიშნა, რომ ახალი მეტროსადგურების აშენებისთვის შემოვლითი სარკინიგზო გზის ინფრასტრუქტურას გამოიყენებენ. მისივე თქმით, პერსპექტივაში ეს ხაზი დაეხმარებათ, რომ თბილისის მეტროს შესაბამისი ინფრასტრუქტურით ქალაქი რუსთავიც მიებას.
პროექტის მიხედვით, მიწისზედა მეტრო პრველ ეტაპზე მეტროსადგურ „სამგორს“ ლილოს ბაზრობასთან და აეროპორტთან დააკავშირებს. სამშენებელო სამუშაოები 2019 წლის ბოლოს დაიწყება. 2021 წლიდან 2022 წლის ბოლომდე ექსპლუატაციაში ეტაპობრივად შევა შვიდი ახალი მეტროსადგური და სრულად განახლებული მეტროსადგური „სამგორი“.
მეტროს განვითარების მეორე ეტაპზე იგეგმება თბილისი-რუსთავის დაკავშირება მიწისზედა მეტროს საშუალებით. როგორც თბილისის მერიის მიერ გვარცელებულ ვიდეოშია ნათქვამი, 2019 წელს დაგეგმილი ტექნიკურ-ეკონომიკური კვლევისა და საექსპერტო დასკვნის მიღების შემდეგ შეირჩევა თბილისი-რუსთავის დამაკავშირებელი ოპტიმალური მარშრუტი.
ვიდეო: თბილისის მერია