ორგანიზაცია „პარტნიორობა ადამიანის უფლებებისთვის (PHR) ზვიად დევდარიანის საქმეზე ომბუდსმენის დასკვნის შესახებ ინფორმაციას ავრცელებს. 

ორგანიზაციამ აღნიშნულ თემაზე საგანგებო პრესკონფერენცია დანიშნა, დღეს 8 საათზე.

გავრცელებული ინფორმაციით, 5 შემთხვევიდან, რომელსაც ომბუდსმენი სწავლობდა, 3 შევიწროების ფაქტი დადასტურდა.

„PHR-ისთვის ცნობილი გახდა 2018 წლის პირველ ნოემბერს სახალხო დამცველის მიერ გამოცემული რეკომენდაციის შესახებ, რომლის თანახმადაც, „ზვიად დევდარიანის მხრიდან ადგილი ჰქონდა პროფესიული და საზოგადოებრივი მდგომარეობის გამოყენებით (...) არასასურველი, სექსუალური ხასიათის ვერბალურ და ფიზიკურ ქცევას, რომელმაც მათ შეუქმნა დამამცირებელი და შეურაცხმყოფელი გარემო“.

„ლიბერალი" დაუკავშირდა ომბუდსმენის აპარატს, რომელიც ზვიად დევდარიანის მხრიდან სავარაუდო სექსუალური შევიწროების ხუთ შემთხვევას სწავლობდა. ომბუდსმენის თქმით, აღნიშნულ თემაზე ჯერ დასკვნები არ გაუსაჯაროებიათ. შეკითხვაზე, ხუთიდან რამდენ შემთხვევაზე დადგინდა სექსუალური შევიწროების ფაქტი, ამ ეტაპზე არ გვიპასუხეს.