აშშ-ში შუალედური არჩევნების წინ Facebook-მა ათობით ანგარიში დახურა. ინფორმაციას CNN ავრცელებს. Instagram-სა და Facebook-ზე შექმნილი საეჭვო გვერდების დახურვის გადაწყვეტილება კომპანიამ სამართალდამცველებთან შეხვედრის შემდეგ მიიღო.

„კვირა საღამოს ჩვენ სამართალდამცავი სტრუქტურებიდან დაგვიკავშირდნენ. მათ საეჭვო ონლაინაქტივობები აღმოაჩინეს, რომელიც შესაძლოა, უცხო ქვეყნების სპეცსამსახურებს უკავშირდებოდეს“, - განაცხადა Facebook-ის კიბერუსაფრთხოების ხელმძღვანელმა, ნათანიელ გლეიჩერმა.

როგორც ცნობილია, კომპანიამ 30 Facebook და 85 Instagram ანგარიში დახურა.

გლეიჩერის თქმით, ჯერჯერობით დადასტურებული არ არის, ეკუთვნოდა თუ არა სავარაუდოდ ყალბი ანგარიშები რუსულ ან სხვა ქვეყნის სპეცსამსახურებს. „გამოძიება მიმდინარეობს და ინფორმაციას განვაახლებთ, როცა მეტი დეტალი გვეცოდინება“, - აცხადებს Facebook-ის კიბერუსაფრთხოების ხელმძღვანელი.

სახელმწიფო უსაფრთხოების სამსახურების ერთობლივი განცხადებით, მიუხედავად იმისა, რომ ამ არჩევნებში უშუალო ჩარევის კვალი არ არის, ჩანს სპეცსამსახურების მცდელობა, გავლენა მოახდინონ ამერიკელ ამომრჩეველზე.

„ამერიკელები ფხიზლად უნდა იყვნენ. უცხოელი აქტორები, განსაკუთრებით კი რუსეთი, კვლავ ცდილობენ საზოგადოებრივ აზრზე ზეგავლენას და ამომრჩეველთა დამოკიდებულებების შეცვლას. ეს ხდება პოლიტიკურ პროცესებსა და კანდიდატებზე ცრუ ინფორმაციის გავრცელებით, სიცრუისა და პროპაგანდის ტირაჟირებითა და სხვა მეთოდებით“, - ნათქვამია უსაფრთხოების სამსახურების ერთობლივ განცხადებაში.