ალკოჰოლური კომპანიის მფლობელმა და 2004-2008 წლებში ზუგდიდის მაჟორიტარმა, გოჩა ფიფიამ დღეს ზუგდიდში შეხვედრა გამართა.
ის ოპოზიციური კანდიდატის საწინააღმდეგო განცხადებებით გამოვიდა და თქვა, რომ „მთელი გუნდით მხარს უჭერს პრეზიდენტობის დამოუკიდებელ კანდიდატ სალომე ზურაბიშვილს.“
გოჩა ფიფიამ 31 ოქტომბერს ალკოჰოლური კომპანიის „ზეარისის“ თანამშრომლებთან ერთად ბრიფინგი გამართა, სადაც განაცხადა, რომ დროებით დავკეტავთ ოფისებს. იმუშავებენ მხოლოდ მორიგე მენეჯერები, სხვა თანამშრომლები კი „გავიშლებით თბილისსა და საქართველოს ყველა რეგიონში და არა მხოლოდ მივიღებთ მონაწილეობას არჩევნებში, არამედ ვაწარმოებთ ახსნა-განმარტებით სამუშაოებსაც.“ - განაცხადა ფიფიამ.
--------------
ალკოჰოლური სასმელების კომპანია „ნაციონალური მოძრაობის“ საწინააღმდეგო კამპანიას იწყებს
„ზეარისი" ამჟამად შალვა რამიშვილის ონლაინგადაცემის, „პიანი ბაზრის" სპონსორია.
გოჩა ფიფია 1996-2003 წლებში შპს „უშბის“ გენერალური დირექტორი. 2013 წლიდან კომპანია „ზეარის“ დამფუძნებელი.[1] საქართველოს მე-6 მოწვევის პარლამენტის წევრი (2004-2008), საქართველოს მე-6 მოწვევის პარლამენტის რეგიონული პოლიტიკის, თვითმმართველობისა და მაღალმთიანი რეგიონების კომიტეტის წევრი (2004-2008).[2]
კომპანია „ზეარისთან“ დაკავშირებით იძებნება სტუდია „მონიტორის“ მიერ 2017 წელს მომზადებული მასალა, რომლის მიხედვითაც, სახელმწიფო უწყებებმა ერთ ბოთლ ჭაჭაში 50-დან 160 დოლარამდე გადაიხადეს. ალკოჰოლური სასმელის შესაძენად 70 ათას ლარზე მეტი დაიხარჯა.
მედიასაშუალების ინფორმაციით, არყის შესაძენად ტენდერი არ გამოცხადებულა და ალკოჰოლი კომპანია ზეარისისგან შეიძინეს. კომპანიის დირექტორი თეონა ზაქრაძეა, რომელიც ყოფილი პარლამენტარის, გოჩა ფიფიას ცოლია.
ყველაზე მეტი ღირებულების (31 ათასი ლარი) ალკოჰოლური სასმელი საქართველოს ფოსტამ იყიდა, სხვა უწყებებმა კი - შედარებით ნაკლები. სტუდია მონიტორს განუცხადეს, რომ სასმელი სტუმრებისთვის შეისყიდეს.
