შსს-ს ყოფილი მაღალჩინოსანი ირაკლი ფირცხალავა საავადმყოფოშია გადაყვანილი, - ამის შესახებ ინფორმაციას იუსტიციის სამინისტროს სპეციალური პენიტენციური სამსახური ავრცელებს და აღნიშნავს, რომ მსჯავრდებულის ჯანმრთელობის მდგომარეობაზე ინფორმაციას პოლიტიკური სპეკულაციების თავიდან ასაცილებლად ასაჯაროებენ.
„მსჯავრდებული უჩივის საერთო სისუსტეს, გულისრევის შეგრძნებას, უმადობას, ტკივილს ნაღვლის ბუშტის არეში, აღენიშნება წონაში კლება. ქირურგის რეკომენდაციით დაინიშნა ოპერაცია, რისთვისაც პენიტენციური სამსახურის მედპერსონალმა მსჯავრდებულის სამოქალაქო სექტორის სამედიცინო დაწესებულებაში გადაყვანა მიიჩნია საჭიროდ. შესაბამისად, თავად მსჯავრდებულის თანხმობით მოხდა მისი გადაყვანა სამოქალაქო სექტორის სამედიცინო დაწესებულებაში ნაღვლის ბუშტზე ოპერაციის ჩასატარებლად", - ვკითხულობთ განცხადებაში.
ირაკლი ფირცხალავა 2006 წლის 2 მაისს, ე.წ „კორტების სპეცოპერაციისას“ მოკლული ზურაბ ვაზაგაშვილისა და ალექსანდრე ხუბულოვის საქმეა მსჯავრდებული.