სახელმწიფო აუდიტის სამსახური „ერთიანი ნაციონალური მოძრაობის“ საწინააღმდეგო მოძრაობის ფინანსებს შეისწავლის. როგორც „ლიბერალს“ აუდიტის სამსახურში განუცხადეს, ამ მოთხოვნით აუდიტს არასამთავრობო ორგანიზაციებმა გუშინ მიმართეს.
„საერთაშორისო გამჭვირვალობა - საქართველოს“ წარმომადგენემა ლევან ნატროშვილმა „ლიბერალს“ უთხრა, რომ აუდიტის სამსახური უნდა დაინტერესდეს და შეისწავლოს ის ფინანსები, რომელსაც „სახალხო მოძრაობა“ და მოძრაობა „მე ვიცავ თავისუფლებას“ ხარჯავენ.
როგორც ია მეტრეველი ამბობს, სახალხო მოძრაობა „არა ნაციზმს“ თავად უზრუნველყოფს მათ ტრანსპორტირებას საარჩევნო უბნებზე, ვინც რეგიონებში ხმის მისაცემად გამგზავრებას ვერ ახერხებს, რათა ხელისუფლებაში „ნაციონალური მოძრაობის“ დაბრუნებას ხელი შეუშალონ.
ლევან ნატროშვილმა „ლიბერალს“ განუმარტა, რომ ამომრჩეველთა მობილიზებას თუ ახდენს ორგანიზაცია და ამისთვის თანხას ხარჯავს, ეს უნდა ჩაითვალოს შემოწირულობად.
მისი თქმით, ამ შემთხვევაში ცხადია, ვის სასარგებლოდაც არის შემოწირულობა, პირდაპირაც რომ არ იყოს გაცხადებული, რომ სალომე ზურაბიშვილს უჭერენ მხარს, იგი მაინც იქნებოდა შემოწირულობა. მეორე ტურში ორი კანდიდატია და ძნელი დასადგენი არ არის, ვის სასარგებლოდ მოქმედებენ.