„ქართული ოცნების“ გენერალურმა მდივანმა, კახა კალაძემ, ჟურნალისტებს განუცხადა რომ წინასაარჩევნოდ პარტიას შიდა კვლევები აქვს, თუმცა კვლევის შედეგებზე ჟურნალისტებთან არ უსაუბრია. მისივე თქმით, კვლევა ამჯერად „ფსიქოპროექტს“ არ ჩაუტარებია.
კალაძე ასევე გამოეხმაურა Edison Research-ის კვლევის შედეგებს, რომელიც ტელეკომპანია „რუსთავი 2-ის“ დაკვეთით ჩატარდა და დღეს გასაჯაროვდა. კალაძე ამბობს, რომ „კვლევის შედეგები არის ძალიან დიდი ტყუილი და მოსახლეობის შეცდომაში შეყვანის მცდელობა.
Edison Research-მა ტელეკომპანია „რუსთავი 2-ის“ დაკვეთით მორიგი კვლევა ჩაატარა. „საპრეზიდენტო არჩევნების მეორე ტური დღეს რომ ტარდებოდეს, ვის მისცემდით ხმას?“ - ასეთი იყო შეკითხვა, რომლითაც მკვლევრებმა 2 000 მოქალაქეს მიმართეს.
ტელეკომპანიის ინფორმაციით, სრული ალოკაციით შედეგები ასე გადანაწილდა:
56% ამბობს, რომ ხმას გაერთიანებული ოპოზიციის კანდიდატს, გრიგოლ ვაშაძეს მისცემდა, ხოლო 44% - „ქართული ოცნების“ მიერ მხარდაჭერილ კანდიდატს, სალომე ზურაბიშვილს.
რაც შეეხება ალოკაციის გარეშე მიღებულ შედეგებს, ისინი ასე გადანაწილდა:
გრიგოლ ვაშაძე - 38%;
სალომე ზურაბიშვილი - 34%;
არ ვიცი/არ ვპასუხობ - 18%;
არც ერთს - 10%.