ევროპარლამენტი საქართველოს ხელისუფლებას მოუწოდებს, გადადგას შემდგომი ნაბიჯები ადამიანის უფლებების, განსაკუთრებით კი მოწყვლადი ჯგუფების ფუნდამენტური უფლებების დასაცავად, მათ შორის სიძულვილის ენასა და დისკრიმინაციასთან ბრძოლით, შრომით ბაზარზე შრომის განახლებული კოდექსის მეშვეობით, დაიცვას ლგბტ ადამიანები, ბოშები, აივ-ინფიცირებული და შშმ პირები, სხვა უმცირესობები.
შესაბამისი მოწოდება ევროპარლამენტის მიერ მომზადებულ ანგარიშშია ნათქვამი, რომელიც „ასოცირების შეთანხმების" შესრულებას ეხება და რომელსაც კენჭი დღეს უნდა უყარონ პლენარულ სხდომაზე.
დოკუმენტში ევროპარლამენტი საქართველოს მოუწოდებს, შშმ პირთა უფლებების შესახებ კანონმდებლობა შეუსაბამოს გაეროს კონვენციას, რომლის რატიფიცირებაც 2014 წელს მოხდა.
„ევროპარლამენტი მოუწოდებს საქართველოს ხელისუფლებას, გადადგას შემდგომი ნაბიჯები ქალების დასაცავად ყველა ფორმის ძალადობისა და სექსუალური შევიწროებისგან სამუშაო და საჯარო ადგილებში. ამავდროულად, გაზარდოს ქალთა წარმომადგენლობა შრომით ბაზარზე და პოლიტიკაში, სადაც ისინი ნაკლებად არიან წარმოდგენილნი" - ნათქვამია ანგარიშში.
ევროპარლამენტი ასევე საუბრობს ბავშვთა უფლებების დაცვის მნიშვნელობაზე და ხელისუფლებას მოუწოდებს, გააძლიეროს ძალისხმევა ბავშვთა მიმართ ძალადობის პრევენციისთვის, უზრუნველყოს განათლების ხელმისაწვდომობა ბავშვებისთვის (მათ შორის შშმ). ამავდროულად, ხაზს უსვამს საქართველოს მთავრობის ვალდებულებას, ზედამხედველობა გაუწიოს ბავშვებს თავშესაფრებსა და რელიგიური ჯგუფების საცხოვრებელ დაწესებულებებში.
