გუშინ ავტოსაგზაო შემთხვევის შედეგად ჟინვალის წყალსაცავში ჩავარდნილი მამაკაცის სამძებრო სამუშაოები გრძელდება. როგორც შსს-ს განცხადებაშია ნათქვამი, მამაკაცი დასაქმებული იყო კომპანიაში, რომელიც აღნიშნულ მონაკვეთზე სამუშაოებს ასრულებდა.
როგორც „ლიბერალს“ საგანგებო სიტუაციების მართვის სამსახურში განუცხადეს, მამაკაცი მაშველებმა იპოვეს და ამ წუთებში მის ამოყვანას ცდილობენ.
შსს-ს ინფორმაციით, მომხდარზე გამოძიება დაწყებულია.
დუშეთის რაიონში შემთხვევა 14 ნოემბერს, საღამოს საათებში მოხდა. სამუშაოების შესრულებისას ავტოსაგზაო შემთხვევის შედეგად გზიდან გადავიდა და ჟინვალჰესის წყალსაცავში ჩავარდა ბეტონმზიდი.
„გამოძიების პირველადი ინფორმაციით ჟინვალი-თვალივის საავტომობილო გზაზე სამუშაოებს ერთ-ერთი კერძო კომპანია ასრულებს, სადაც დასაქმებული იყო სპეციალური სატრანსპორტო საშუალების მძღოლი ი.ჟ.
მომხდარ ფაქტთან დაკავშირებით გამოძიება სისხლის სამართლის კოდექსის 276 მუხლით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს“, - წერია შსს-ს განცხადებაში.