ფონიჭალაში, სავარაუდოდ, გაზის აფეთქების შედეგად დაშავებული ოჯახის წევრების ჯანმრთელობის მდგომარეობა სტაბილურია. 

დამწვრობის ცენტრის ხელმძღვანელის, გუგა ქაშიბაძის თქმით,  დამწვრობები ძირითადად მეორე-მესამე ხარისხის არის და დაშავებულები რეანიმაციულ განყოფილებაში მკურნალობენ.

სამივე პირი ერთი ოჯახიდანაა - 44 წლის მამაკაცი, მისი 24 წლის შვილი და 6 წლის შვილიშვილი. დამწვრობის ცენტრის დირექტორის განმარტებით, მათ სხეულის სხვადასხვა მიდამოს სერიოზული დამწვრობები აღენიშნებათ. კერძოდ, 44 წლის მამაკაცს სხეულის 65%, მის შვილს 55%, ბავშვს კი 12% აქვს დამწვარი. 

კორპუსის ერთ-ერთ ბინაში აფეთქება, სავარაუდოდ, ბუნებრივი აირის გაჟონვამ გამოიწვია. დანგრეულია რამდენიმე სართული, დაშავებულია სამი და გარდაცვლილია ორი ადამიანი. დაშავებულებს შორის ერთ-ერთი 6 წლის ბავშვია, ხოლო გარდაცვლილებს შორის - 9 თვის ჩვილი და ჩვილის დედა. 

ზემო ფონიჭალაში, საცხოვრებელი კორპუსის ერთ-ერთ ბინაში მომხდარ აფეთქებასთან დაკავშირებით გამოძიება  სისხლის სამართლის კოდექსის 240-ე პრიმა მუხლის მეორე ნაწილით მიმდინარეობს. ეს მუხლი ელექტრო და თბოენერგიის, გაზის, ნავთობის ან ნავთობპროდუქტების ობიექტზე უსაფრთხოების წესის დარღვევას გულისხმობს, რამაც ადამიანის სიცოცხლის მოსპობა ან სხვა მძიმე შედეგი გამოიწვია.