„გაუქმებული რელიკვია“- ლიტერატურის მუზეუმში ამ სახელწოდებით გამოფენა იხსენება.
გამოფენის კურატორების თქმით, გამოფენის იდეა ეფუძნება უახლესი სახელოვნებო ისტორიის გაანალიზებას, კერძოდ, საბჭოთა პერიოდის ხელოვნების იდეოლოგიური მოტივებისა და დღევანდელი სამომხმარებლო კულტურის კრიტიკას.
„გამოფენა წარმოადგენს დიალოგს დროსა და სივრცეში, სადაც მუზეუმის ექსპონატები არტეფაქტები, კონკრეტული დროის აღმნიშვნელი დოკუმენტები - „გაუქმებული რელიკვიის“ ნიმუშებია, რომლებიც ახალი კონტექსტის ძიებას იწყებენ თანამედროვე ვიზუალური ხელოვნების ნიმუშების გვერდით“, - აცხადებენ ისინი.
ექსპერიმენტული გამოფენა „გაუქმებული რელიკვია“ (Invalid Memorabilia) ახალგაზრდა კურატორთა საინიციატივო ჯგუფის ალგორითმი F5-ის თანამშრომლობითი პროექტია სამ მუზეუმსა და თანამედროვე ხელოვანებს (თეა გვეტაძე, ნინო საკანდელიძე, ნინო ქვრივიშვილი, თემო ჯავახი) შორის.
გამოფენაში წარმოდგენილი კოლექციები დაცულია საქართველოს ხალხური და გამოყენებითი ხელოვნების მუზეუმსა და აბრეშუმის სახელმწიფო მუზეუმის ფონდებში. მუზეუმების ექსპონატები განსხვავებულ მედიებს მოიცავს (კერამიკა, ფერწერა, სკულპტურა, ტექსტილის ალბომები, ესკიზები) და ინტერპრეტაციული კვლევით აერთიანებს საბჭოთა პერიოდის რამდენიმე დეკადას (XXს.-ის 40-50-60-70 იანი წლები).
„სამუზეუმო კოლექციის ნიმუშები მოწვეულ თანამედროვე არტისტთა ინსტალაციების გვერდით ქმნის ახალ დისკურს; სპეციფიკური ვიზუალური კოდებისა და ინტერპრეტაციების მეშვეობით კი ცდილობს გამოკვეთოს შრეები, სადაც ხელოვნების იდეური ძალა, ფორმალური გადაწყვეტა ეპოქალურ მახასიათებლებსა და სუბიექტურ აღქმებს შორის ზღვარს ქმნის“,- აცხადებენ ორგანიზატორები.
პროექტის ხელმძღვანელია მარიამ შერგელაშვილი, ხოლო მკვლევარი კურატორები: კონსტანტინე ბოლქვაძე, ელისაბედ რეხვიაშვილი.