თბილისის საქალაქო სასამართლომ ცენტრალური საარჩევნო კომისიის (ცესკო) გადაწყვეტილება საზღვარგარეთ საარჩევნო დღის 24:00 საათამდე გახანგრძლივების შესახებ ძალაში დატოვა. ინფორმაციას ცესკო ავრცელებს.
ცესკო-ს განმარტებით, რადგან საქართველოს ფარგლებს გარეთ 28 ნოემბერი უქმე დღედ ვერ გამოცხადდება, საარჩევნო კომისიამ მიიღო გადაწყვეტილება, რომ საზღვარგარეთ შექმნილი საუბნო საარჩევნო კომისიები უფრო ხანგრძლივად იმუშავებენ და ხმის მიცემის პროცედურები გაგრძელდება შესაბამისი ქვეყნის ადგილობრივი დროით, არჩევნების დღის 24:00 საათამდე.
თბილისის საქალაქო სასამართლოს სარჩელით მიმართეს სადამკვირვებლო ორგანიზაციებმა „საერთაშორისიო გამჭვირვალობა - საქართველომ“ და „სამართლიანი არჩევნებისა და დემოკრატიის საერთაშორისო საზოგადოებამ“. მათი განცხადებით, ცესკო-მ არჩევნების სამუშაო დღეს დანიშვნით საზღვარგარეთ მყოფ ამომრჩეველს ხელოვნური ბარიერი შეუქმნა. ისინი ცესკო-ს ამ გადაწყვეტილების ბათილობას ითხოვდნენ. თუმცა, სასამართლომ არასამთავრობოების მოთხოვნა არ დააკმაყოფილა.
საპრეზიდენტო არჩევნების მეორე ტური 28 ნოემბერს გაიმართება, რომელიც ოთხშაბათია და საქართველოს მასშტაბით უქმე დღედ გამოცხადდება.