"ომეგა ჯგუფის" დამფუძნებელმა ზაზა ოქუაშვილმა დღეს ტელეკომპანია „რუსთავი 2-ის“ ეთერში განაცხადა, რომ მას ბიძინა ივანიშვილი სთხოვდა „იმედის“ ეთერში განცხადება გაეკეთებინა და ეთქვა, რომ გამოქვეყნებული კომპრომატები დადგმული იყო და ამის გაკეთება ნიკა გვარამიამ და მიხეილ სააკაშვილმა სთხოვეს.

ზაზა ოქუაშვილის თქმით, მას ჰქონდა პოზიტიური განწყობები: "ეს დაიწყო 23 ოქტობრიდან და მართალი რომ გითხრათ, მეამიტურად ვიყავი განწყობილი, იმდენად, რომ სახელწმიფომ ბოლოს და ბოლოს დაანება ფეოდალიზმს თავი, რეკეტს და კრიმინალს და დადგა სწორ გზაზე", - ამბობს ოქუაშვილი „რუსთავი 2-თან“ ინტერვიუში. 

„კვირის აქცენტებში“ ჟურნალისტებმა ინტერვიუს ის ტექსტიც წაიკითხეს, რომელიც, ზაზა ოქუაშვილის თქმით, მას დაუწერეს რომ ეთქვა „იმედის“ ეთერში. 

ზაზა ოქუაშვილის თქმით, მას შემდეგ, რაც სახელმწიფომ მიიღო გადაწყვეტილება, რომ "ომეგა ჯგუფი" აქციზებს მიიღებდა, აქციზური მარკების სამსახურმა, გადახდილი ფულის სანაცვლოდ აქციზები გასცა, "ქართუ ბანკმა" კი კრედიტის სახით კომპანიას 8 მილიონი ლარი გამოუყო.

ზაზა ოქუაშვილმა ასევე აღნიშნა, რომ არჩევნებამდე ხელისუფლებასთან თითქოს ურთიერთობის დალაგების შემდეგ, 24 ოქტომბერს მისმა კომპანიამ ის სასამართლო პროცესი მოიგო, რომელიც ორ წელზე მეტი გრძელდებოდა.