თბილისის სააპელაციო სასამართლომ ვალერი გელაშვილის ცემის საქმეზე საქართველოს ყოფილი პრეზიდენტის, მიხეილ სააკაშვილის მიმართ თბილისის საქალაქო სასამართლოს გამამტყუნებელი განაჩენი ძალაში დატოვა. ამის შესახებ „ლიბერალს“ სააპელაციო სასამართლოში განუცხადეს.
საქმის მოსამართლე გერონტი კახეთელიძე იყო.
სააკაშვილს ვალერი გელაშვილის ცემის საქმეზე 6 წლით თავისუფლების აღკვეთა მიესაჯა.
საუბარია 2005 წელს დეპუტატ ვალერი გელაშვილზე მომხდარ შეიარაღებულ თავდასხმასა და მისი ცემის ფაქტზე.
ამ საქმეზე სასამართლომ გამამტყუნებელი განაჩენი უკვე გამოუტანა შინაგან საქმეთა ყოფილ მინისტრს, ვანო მერაბიშვილს, სოდ-ის ყოფილ უფროსს, ერეკლე კოდუასა და ამავე დეპარტამენტის სამმართველოს ყოფილ უფროსს, გია სირაძეს. მერაბიშვილს 6 წლითა და 9 თვით, ერეკლე კოდუასა და გია სირაძეს კი 9 წლით თავისუფლების აღკვეთა მიესაჯათ.
მიმდინარე წლის იანვარში სანდრო გირგვლიანის მკვლეობაში მსჯავრდებულთა შეწყალების საქმეზე მიხეილ სააკაშვილს 3 წლით თავისუფლების აღკვეთა მიესაჯა. გამამტყუნებელი განაჩენი თბილისის საქალაქო სასამართლოს მოსამართლემ, გიორგი არევაძემ გამოაცხადა.
