თბილისის სააპელაციო სასამართლომ ფოტორეპორტიორების საქმეზე გამამართლებელი განაჩენი გამოიტანა. სასამართლომ წარსულში ჯაშუშობის ბრალდებით დაკავებული ფოტოგრაფები უდანაშაულოდ ცნო.
საქმე ეხება 2011 წლის საქალაქო სასამართლოს განაჩენს, რომლის მიხედვით, ფოტორეპორტიორები ირაკლი გედენიძე, ნათია გედენიძე, ზურაბ ქურციკიძე და გია აბდალაძე ჯაშუშობის ბრალდებით დამნაშავედ ცნეს.
პროკურატურამ ფოტორეპორტიორების გიორგი აბდალაძის, ზურაბ ქურციკიძის, ირაკლი და ნათია გედენიძეების მიმართ გამოტანილი გამამტყუნებელი განაჩენების გადასინჯვის თაობაზე თბილისის სააპელაციო სასამართლოს 2017 წელს მიმართა.
პროკურორის თქმით, საქმეში გაჩნდა ახალი გარემოებები, რის გამოც პროკურატურა გამამართლებელი განაჩენების გამოტანას მოითხოვდა.
პროკურატურაში აცხადებენ, რომ საქმეზე ხელახალი გამოძიება ჩატარდა, დაიკითხნენ მოწმეები და დადასტურდა, რომ 2011 წელს ფოტორეპორტიორები ჯაშუშობის გამოგონილი ბრალდებით დააკავეს. პროკურატურამ საქმე 2016 წლის ივნისში გახსნა. სამსახურებრივი უფლებამოსილების გადამეტების ფაქტზე კონტრდაზვერვის ყოფილი უფროსის ყოფილი მოადგილე დავით დევნოზაშვილი მსჯავრდებულია. ასევე, დაუსწრებლად შეეფარდა თავისუფლების აღკვეთა გლდანის მე-8 პენიტენციური დაწესებულების ყოფილ დირექტორს, ალექსანდრე მუხაძეს.
