საქართველოს ფინანსთა მინისტრის ივანე მაჭავარიანის თქმით, საბოლოოდ, კომპანია Vivus-სა და ფონდ „ქართუს“ შორის შედგა შეთანხმება და ხანდაზმული ვალები ამ მიკროსაფინანსო ორგანიზაციის კლიენტებსაც ჩამოეწერებათ.
„მიღწეულია შეთანხმება, მე როგორც ვიცი და Vivus-იც შეუერთდება ამ ინიციატივას. ვისაც ერთ წელზე ხანდაზმული დავალიანებები აქვთ და აკმაყოფილებენ კრიტერიუმებს, შეძლებენ ისარგებლონ აღნიშნული ინიციატივით. მე მგონი, შედგა მოლაპარაკება, Vivus-იც ჩაერთო ამ საერთო ფერხულში და პრობლემები არ იქნება“, - თქვა ფინანსთა მინისტრმა „იმედის“ პირდაპირ ეთერში მთავრობის ახალ ინიციატივაზე საუბრისას.
თავდაპირველად, მინისტრმა თქვა, რომ ერთ წელზე ხანდაზმული პრობლემური სესხების ჩამოწერა კომპანია Vivus-ის კლიენტებს არ შეეხებოდათ. „Vivus-მა ჩემთვის გაუგებარი მიზეზებით უარი განაცხადა მონაწილეობაზე“, – თქვა მინისტრმა 19 ნოემბერს.
Vivus-მა კი საპასუხოდ განაცხადა, რომ ფინანსთა სამინისტროს მიაწოდეს ინფორმაცია ვადაგასული სესხების შესახებ, თუმცა ფინანსთა სამინისტრო მათთან კონტაქტზე აღარ გასულა.
600 ათასი მოქალაქე ვალის გარეშე შეხვდება ახალ წელს - ბახტაძე
გოცირიძე: ბანკებმა აქამდე დაახლოებით 600 მილიონი ლარის ოდენობის უიმედო ვალი ჩამოწერეს