ცენტრალური საარჩევნო კომისიის ინფორმაციით, საპრეზიდენტო არჩევნების მეორე ტურისთვის, პირველ ტურთან შედარებით, 9 745 ამომრჩევლით მეტია რეგისტრირებული. კომისიაში ამ მატებას იმით ხსნიან, რომ 28 ნოემბერს დაგეგმილ არჩევნებში მონაწილეობას ის პირებიც მიიღებენ, ვისაც 28 ოქტომბრის შემდეგ შეუსრულდა 18 წელი. ასევე ის პირებიც, ვინც პირველი ტურისთვის ვერ მოახერხა რეგისტრაციის გავლა.
28 ოქტომბერს გამართული არჩევნებისთვის, როგორც საქართველოში, ასევე მის ფარგლებს გარეთ, სულ 3 518 877 მოქალაქე იყო რეგისტრირებული. ხოლო მეორე ტურისთვის მათი რაოდენობა 3 528 658-ია.
მაგალითად, საბურთალოს საარჩევნო ოლქში ამომრჩეველთა რაოდენობა 579-ით არის გაზრდილი, ისნის საარჩევნო ოლქში - 507-ით, სამგორში - 583-ით, გლდანში - 656-ით, გორში - 307-ით, ქუთაისში - 230-ით, ბათუმში - 553-ით, საზღვარგარეთ - 134-ით.
