საქართველოს პრეზიდენტმა გიორგი მარგველაშვილმა არჩევნების მეორე ტურთან დაკავშირებით ბრიფინგი გამართა და სალომე ზურაბიშვილს გამარჯვება მიულოცა.
„ვულოცავ საქართველოს არჩეულ მეხუთე პრეზიდენტს - სალომე ზურაბიშვილს. ვუსურვებ წარმატებას. ასევე მინდა ვთქვა, როგორც კი ქალბატონი სალომე დაასახელებს პასუხისმგებელ პირს, ჩვენ მზად ვართ, დავიწყოთ თანამშრომლობა როგორც ადმინისტრაციული საქმის გადაბარებაზე, ისე ინაუგურაციის მოწყობის პროცესში მონაწილეობასა და დახმარებაზე.
ღმერთმა დალოცოს ჩვენი სამშობლო - საქართველო და გააძლიეროს ჩვენი პრეზიდენტი“, - თქვა მარგველაშვილმა.
პრეზიდენტმა მადლობა გადაუხადა სადამკვირვებლო ორგანიზაციებს, მედიებს და ასევე შეშფოთება გამოთქვა მეორე ტურში დემოკრატიის ხარისხის ვარდნაზე.
„გუშინდელ არჩევნებზე დაკვირვებით და სადამკვირვებლო ორგანიზაციების ანალიზის საფუძველზე, მინდა, შეშფოთება გამოვხატო მეორე ტურში დემოკრატიის ხარისხის მკვეთრ ვარდნაზე. მინდა, ერთმნიშვნელოვნად ვთქვა, რომ საქართველოში ასეთი, ამ სტანდარტის არჩევნები მეტი აღარ უნდა ჩატარდეს“, - განაცხადა გიორგი მარგველაშვილმა.
საქართველოს საპრეზიდენტო არჩევნების მეორე ტურში „ქართული ოცნების“ მხარდაჭერილმა კანდიდატმა, სალომე ზურაბიშვილმა ხმების თითქმის 60%-მდე აიღო და ქვეყნის მეხუთე პრეზიდენტი გახდება.
