“რესპუბლიკური პარტია” გაერთიანებული ოპოზიციის მიერ დაგეგმილ დღევანდელ აქციაში მონაწილეობას არ მიიღებს.
ამის შესახებ პარტიის თავმჯდომარემ, ხათუნა სამნიძემ, გუშინ, 1 დეკემბერს ოპოზიციის შტაბში გამართული შეხვედრის შემდეგ განაცხადა.
მისი თქმით, პარტია გაერთიანებული ოპოზიციის ინიციატივებისა და მოთხოვნებისადმი სოლიდარული რჩება, თუმცა აქციაში მონაწილეობას არ მიიღებენ.
„ჩვენ ამ მოთხოვნებში ვართ მათთან სოლიდარული, ვეთანხმებით, ძირითადი თემა არის საარჩევნო გარემო, საარჩევნო პროცედურები, საარჩევნო სისტემა, რაც ძირეულად შესაცვლელია, ჩვენ მათ მხარს ვუჭერთ ამ ინიციატივებში და მხარს დავუჭერთ მომავალშიც. გაერთიანებული ოპოზიცია ხვდება თავის მხარდამჭერებს და რა თქმა უნდა, ჩვენც სოლიდარობას ვუცხადებთ ამ ადამიანებს, გაერთიანებულ ოპოზიციას, მათ შორის, მოთხოვნებს, რომელიც აქ გაჟღერდება. ჩვენ არ ვიქნებით წარმოდგენილი თავად აქციაზე,“ - განაცხადა ხათუნა სამნიძემ.
გაერთიანებული ოპოზიციის პრეზიდენტობის კანდიდატმა, გრიგოლ ვაშაძემ, 29 ნოემბერს ფილარმონიაში შეკრებილ მხარდამჭერებთან გამოსვლისას 2 დეკემბერს ფართომასშტაბიანი აქცია დააანონსა.
გრიგოლ ვაშაძის თქმით, ისინი არჩევნების შედეგებს არ აღიარებენ: „მოვითხოვთ ვადამდელ საპარლამენტო არჩევნებს, პროპორციული ან რეგიონულ-პროპორციული სისტემით", - აცხადებს ვაშაძე.
„ევროპული საქართველო“ გაერთიანებული ოპოზიციის აქციას არ შეუერთდება
