ყველაზე შემოსავლიანი იუთუბერი შვიდი წლის ბიჭი გახდა, რომელიც სათამაშოების ვიდეოგანხილვებს წერს. მას უკვე 22 მილიონი დოლარი აქვს გამომუშავებული.

ჟურნალ Forbes-ის რეიტინგით აღმოჩნდა, რომ რაიანმა Ryan ToysReview-დან ჯეიკ პოლს 500 000 დოლარით გადაასწრო, რომლის შემოსავლებიც ასევე სწრაფად იზრდება.

როგორც BBC წერს, რაიანი ვიდეოებს თითქმის ყოველდღე დებს ვიდეოპორტალზე. მის ერთ-ერთ ბოლო ვიდეოს, რომელიც 2 დეკემბერს ატვირთა, უკვე მილიონ-ნახევარზე მეტი ნახვა აქვს.

რაიანისა და ჯეიკ პოლის შემდეგ, მესამე ადგილზე The Dude Perfect-ის არხია. Forbes-ის მიხედვით, ის დაახლოებით 20 მილიონ დოლარს გამოიმუშავებს.

რაიანის შემოსავლები, რომლებიც გადასახადებსა და აგენტებისა თუ იურისტებისთვის მიცემულ თანხებს არ მოიცავს, ბოლო ერთ წელში გაორმაგდა.

NBC-ის შეკითხვას, თუ რატომ მოსწონთ ვიდეოები, რაიანი, რომელიც ახლა უკვე რვის გახდა, პასუხობს: „იმიტომ, რომ მე თავად ვერთობი ამით და ხალისიანი ვარ“.

რაიანს მშობლებმა YouTube-ზე არხი 2015 წლის მარტში გაუხსნეს. მას შემდეგ ბავშვის ვიდეოებს ჯამში 26 მილიარდი ნახვა აქვს, მის არხს კიდევ 17.3 მილიონი გამომწერი ჰყავს.

Forbes-ის ინფორმაციით, რაიანს 22 მილიონიდან 1 მილიონი ვიდეოების წინ გაშვებულმა სარეკლამო ვიდეოებმა მოუტანა, დანარჩენი კი დასპონსორებულ პოსტებზე მოდის.

აგვისტოში, Walmart-მა დაიწყო ექსკლუზიური სათამაშოების სერიის გაყიდვა, რომელსაც „რაიანის სამყარო“ დაარქვა. ვიდეომ კი, რომელშიც რაიანი და მისი მშობლები Walmart-ის მაღაზიაში მის სათამაშოებს ეძებენ, სამ თვეში 14 მილიონი ნახვა მოაგროვა.

რაიანს Walmart-ის კონტრაქტიდან მიღებული შემოსავლები მომავალ წელს კიდევ უფრო გაამდიდრებს.

მისი შემოსავლების 15% ბანკში ინახება და რაიანი გამოყენებას მხოლოდ მას შემდეგ შეძლებს, როცა სრულწლოვანი გახდება.

რაიანს ტყუპი დებიც ჰყავს, რომლებიც მასთან ერთად ვიდეოებში დროდადრო ჩნდებიან.