თბილისის მე-19 საერთაშორისო კინოფესტივალზე დღეს, 4 დეკემბერს გიგიშა აბაშიძის ფილმის, „მეზობლების“ პრემიერა შედგება. ფილმის ჩვენება 19:00 საათზე „ამირანის“ პირველ დარბაზში გაიმართება.
ფილმი საერთაშორისო კონკურსსა და ქართულ პანორამაში მონაწილეობს. გიგიშა აბაშიძე ახალგაზრდა ქართველი რეჟისორია. „მეზობლები“ მისი პირველი სრულმეტრაჟიანი ფილმია. სურათი „იტალიური ეზოს“ სამეზობლოზე მოგვითხრობს. ინვესტორი თითოეულ მათგანს სოლიდურ თანხას სთავაზობს სახლების სანაცვლოდ. ერთის გარდა, ყველა თანახმაა. მეზობლებს შორის ურთიერთობა იძაბება.
21:00 საათზე თბილისის საერთაშორისო კინოფესტივალზე უჩვენებენ იტალიელი რეჟისორის ალიჩე რორვახერის ფილმს „ბედნიერი ლაზარე“. ფილმი მოზარდზე მოგვითხრობს, რომელსაც დროში მოგზაურობა შეუძლია. მასში იტალიური კინოს ახალგაზრდა ქართველი ვარსკვლავი, ლუკა ჩიქოვანი მონაწილეობს. ლუკა ჩვენებას თავადაც დაესწრება.
ინდუსტრიული დღეების ფარგლებში 4 დეკემბერს 18:00 საათზე დაგეგმილია არდმანის ანიმაცური ფილმების რეტროსპექტივა.
თბილისის საერთაშორისო კინოფესტივალი 3 დეკემბერს კინოთეატრ „ამირანში“ გაიხსნა, ნინო ჟვანიას ფილმ „აღლუმის“ ჩვენებით. დაჯილდოების საზეიმო ცერემონიალი 8 დეკემბერს გაიმართება. ფესტივალი 9 დეკემბერს დასრულდება.
კინოფესტივალზე დღეს ასევე ნახავთ: