„მეორე მიზეზი რატომაც თელავზე არჩევანი გავაკეთე არის ის, რომ თელავმა არ მომცა ხმა" - ამის შესახებ საქართველოს არჩეულმა პრეზიდენტმა სალომე ზურაბიშვილმა ინაუგურაციის ადგილზე საუბრის დროს განაცხადა. ზურაბიშვილის კომენტარს IPN ავრცელებს.
არჩეული პრეზიდენტის თქმით, ინაუგურაციის ლოკაციად რამდენიმე ადგილი განიხილებოდა, თუმცა მისი წინადადება იყო, რომ ცერემონია თელავში გამართულიყო.
„ეს იმიტომ, რომ მთელი ჩემი საარჩევნო კამპანია იყო ამ თემაზე, რომ ჩვენ რეგიონები უნდა ამოვწიოთ, რათა ისინი განვითარდეს, რეგიონების გარეშე არ იქნება საქართველოს განვითარება და ვთვლი, რომ თელავი ძალიან სწორი არჩევანია. მეორე მიზეზი რატომაც თელავზე არჩევანი გავაკეთე არის ის, რომ თელავმა არ მომცა ხმა, ესაა ერთ-ერთი წაგებული ადგილი და მინდა ამით ვაჩვენო, რომ მე ვარ ყველას პრეზიდენტი, თუნდაც იმ ადამიანების, ვინც ხმა არ მომცეს", - თქვა ზურაბიშვილმა.
სალომე ზურაბიშვილმა მედიასთან დაადასტურა, რომ ინაუგურაცია თელავში, ერეკლე მეორის სასახლეში ჩატარდება.