ნიკა რურუას ოჯახს საქართველოს ყოფილმა პრემიერმა გიორგი კვირიკაშვილმა მიუსამძიმრა. იგი გარდაცვლილის ოჯახში მივიდა და მედიასთან საუბარში განაცხადა, რომ „როდესაც ადამიანი მიდის, პოლიტიკური აზრთა სხვადასხვაობა აქტუალობას კარგავს". კვირიკაშვილის კომენტარს „რუსთავი 2" ავრცელებს.

„მე ნიკოლოზს ვიცნობ არა ერთი ათეული წელია, ახალგაზრდობიდან. ძალიან გული დამწყდა მისი წასვლის გამო. ჩვენი ცხოვრების გზები გაიყარა, პოლიტიკურადაც სხვადასხვა გუნდში აღმოვჩნდით, მაგრამ როდესაც ადამიანი მიდის, პოლიტიკური აზრთა სხვადასხვაობა აქტუალობას კარგავს. ამიტომ, მინდა მთელი გულით მივუსამძიმრო მის ოჯახს, ახლობლებს და მეგობრებს. ძალიან გულდასაწყვეტია, რომ ამ ასაკში წავიდა ამქვეყნიდან,“ - უთხრა გიორგი კვირიკაშვილმა ჟურნალისტებს.

„ერთიანი ნაცინალური მოძრაობის" წევრი ნიკა რურუა 50 წლის ასაკში 4 დეკემბერს გარდაიცვალა. 

ნიკოლოზ რურუა იყო საქართველოს მეექვსე მოწვევის პარლამენტის წევრი. პარლამენტის წევრობისას იყო თავდაცვისა და უშიშროების კომიტეტის თავმჯდომარის პირველი მოადგილე და იურიდიულ საკითხთა კომიტეტის წევრი.

2009 წლის 9 დეკემბერს ნიკოლოზ რურუა დაინიშნა საქართველოს კულტურის, ძეგლთა დაცვისა და სპორტის მინისტრად.