საქართველოს არჩეული პრეზიდენტის სალომე ზურაბიშვილის თქმით, თუკი ინაუგურაციამდე გრიგოლ ვაშაძე მის გამარჯვებას აღიარებს, გაერთიანებული ოპოზიციის საპრეზიდენტო კანდიდატს ფიცის დადების ცერემონიალზე დაპატიჟებს.
„ინაუგურაციაზე იქნება თუ არა ვაშაძე, დავფიქრდები ამ თემაზე. ხვალ გეტყვით. თუკი ინაუგურაციამდე ვიქნები აღიარებული, როგორც პრეზიდენტი, ის იქნება დაპატიჟებული ინაუგურაციაზე“, - თქვა სალომე ზურაბიშვილმა ჟურნალისტებთან.
ზურაბიშვილის თქმით, ინაუგურაციაზე შესაძლოა „პატრიოტთა ალიანსის“ წევრებიც მიიწვიონ. „რატომაც არა, მაგრამ ინაუგურაციაზე პარტიები არ იქნებიან მიწვეული, ყველა იქნება ცალ-ცალკე. გარდა იმისა, რაც არის პროტოკოლით გათვალისწინებული, პარლამენტის თანამდებობის პირები, თუ სხვა პირები, ეს არის ჩემს გარეშე. მე ვადგენ ჩემი პირადი სტუმრების სიას“, - განაცხადა ზურაბიშვილმა.
პრეზიდენტის ინაუგურაცია 16 დეკემბერს თელავში, ერეკლე მეფის სასახლეში გაიმართება.