სახალხო დამცველის შემაჯამებელი ანგარიშის თანახმად, 2018 წლის განმავლობაში შშმ პირებთან დაკავშირებით წინგადადგმული ნაბიჯები არ არის. მისი განმარტებით, მიუხედავად იმისა, რომ გარკვეული პროგრამების განსახორციელებლად ბიუჯეტი გაიზარდა, ეს ზრდაც ვერ უზრუნველყოფს არსებული მოთხოვნების დაკმაყოფილებას. 

ნინო ლომჯარიას ინფორმაციით, განსაკუთრებულ პრობლემად რჩება გარემოს, ინფორმაციისა და სერვისებზე ხელმისაწვდომობა. ასევე პრობლემაა ინკლუზიური განათლებაც. სახალხო დამცველის თქმით, კვლავ პრობლემაა შშმ პირთა დასაქმების საკითხი - 2018 წელს ეს მაჩვენებელი კვლავ დაბალი იყო. 

ნინო ლომჯარია აღნიშნავს, რომ 2018 წელსაც პრობლემად რჩევა ფსიქიკური პრობლემების მქონე პირთა ინსტიტუციებში ღირსების შემლახავ პირობებში ყოფნის მავნე პრაქტიკა. 

„ზოგიერთ ფსიქიატრიულში არსებული გარემო შეიძლება შეფასდეს, როგორც პაციენტების მიმართ ღირსების შემლახავი და არაადამიანური. რა თქმა უნდა, მივესალმებით იმას, რომ დაიწყო სურამის ფსიქიატრიულის რეაბილიტაცია. თუმცა ამავდროულად უკიდურესად მძიმე პირობებში რჩებიან ხონისა და ბედიანის ფსიქიატრიულ დაწესებულებებში განთავსებული პირები“,- აღნიშნავს ნინო ლომჯარია.