საქართველოს ადვოკატთა ასოციაციის თავმჯდომარე დავით ასათიანი სამართალდამაცვ უწყებებს მიმართავს და მათგან ადვოკატებისთვის პროფესიული საქმიანობის განხორციელების ხელშეშლის ფაქტებით დაინტერესებას სთხოვს.
მისი ინფორმაციით, სოციალურ ქსელში გამოჩნდა გვერდი, რომელიც ადვოკატთა ასოციაციის დისკრედიტაციას ეწევა. მიუხედავად იმისა, რომ ეს გვერდი 6 დეკემბერს „ფეისბუქის“ ადმინისტრაციამ წაშალა, მისი შემქმნელები მომავალში მსგავსი ტიპის გვერდების შექმნით იმუქრებოდნენ.
„რამდენიმე ფაქტი დაფიქსირდა, როცა ადვოკატები, პროფესიული საქმიანობის განხორციელების ფარგლებში, თავდასხმისა და შეურაცხყოფის ობიექტები გახდნენ. ჩვენ გვაქვს ძალიან პრინციპული პოზიცია, თითოეული ადვოკატი თავისი პროფესიული საქმიანობის ფარგლებში უნდა იყოს თავისუფალი და მათზე რაიმე სახის ზეწოლა არ უნდა განხორციელდეს. ჩვენმა საზოგადოებამ უნდა გაიგოს, რომ ადვოკატის და კლიენტის იდენტიფიცირება არ შეიძლება. არ შეიძლება აგრესია გადატანილი იქნეს ადვოკატზე. ჩვენ მივმართავთ შესაბამის ორგანოებს, დაინტერესდნენ აღნიშნულით",- განაცხადა დავით ასათიანმა.